Topdansatışın köhnə
dəftərlərini bağlayırıq.

Topdan Sat

Topdançılar üçün İstifadə Şərtləri və Qaydaları · topdansat.app

Topdan – Topdancılar üçün İstifadə Şərtləri və Qaydaları

1. Ümumi Müddəalar və Şərtlərin Qəbulu

1.1. Bu İstifadə Şərtləri (bundan sonra "Şərtlər") Topdan (bundan sonra "Platforma") ilə tətbiqdə "Topdancı" və ya "Satıcı" (bundan sonra "Topdancı") kimi qeydiyyatdan keçən hüquqi və ya fiziki şəxs arasındakı hüquqi münasibətləri tənzimləyir.

1.2. Topdancı tətbiqdə qeydiyyatdan keçərək və ya "Şərtlərlə razıyam" xanasını işarələyərək bu sənəddəki bütün müddəaları qeyd-şərtsiz qəbul etdiyini təsdiqləyir.

2. Qeydiyyat, Hesab Təhlükəsizliyi və Doğrulama

2.1. Topdancı hesabı yaratmaq üçün Azərbaycan Respublikasının qanunvericiliyinə uyğun olaraq qeydiyyatdan keçmiş, aktiv VÖEN-ə (Vergi Ödəyicisinin Eyniləşdirmə Nömrəsi) malik olmaq məcburidir.

2.2. Topdancı qeydiyyat zamanı təqdim etdiyi bütün məlumatların (şirkət adı, ünvan, əlaqə nömrəsi, VÖEN) tam, dəqiq və aktual olduğuna zəmanət verir.

2.3. Platforma istənilən zaman təqdim olunmuş məlumatların doğruluğunu yoxlamaq üçün əlavə sənədlər (VÖEN çıxarışı, şəxsiyyət vəsiqəsi) tələb etmək hüququna malikdir. Sənədlər təqdim edilmədikdə hesab dondurula bilər.

2.4. Topdancı öz hesabının (şifrə, OTP kodlar) təhlükəsizliyinə tam cavabdehdir. Onun hesabından edilən hər bir əməliyyat Topdancının özü tərəfindən edilmiş sayılır.

3. Abunəlik Sistemi, Tariflər və Ödənişlər

3.1. Ödənişsiz (Free) Paket: Yeni qeydiyyatdan keçmiş hər bir Topdancıya Platforma daxilində ödənişsiz olaraq maksimum 10 (on) ədəd məhsulu (və ya çeşidi) sistemə daxil etmək və nümayiş etdirmək hüququ verilir.

3.2. Premium (Ödənişli) Abunəlik: Topdancı sistemə 11-ci məhsulu və daha artığını əlavə etmək istədikdə, Platformanın təqdim etdiyi "Aylıq Abunəlik" (və ya illik) paketinə keçid etməlidir.

3.3. Ödəniş Şərtləri: Abunəlik haqqı 1 (bir) aylıq dövr üçün əvvəlcədən (pre-paid) ödənilir. Abunəlik dövrü bitdikdə ödəniş yenilənməzsə, Topdancının hesabı "Məhdudlaşdırılmış Rejimə" (yalnız 10 məhsulun görünməsi və ya hesabın dondurulması) keçirilir.

3.4. Geri Qaytarılmama (No Refund) Siyasəti: Abunəlik ödənişi edildikdən sonra, Topdancı ayı tamamlamadan xidmətdən imtina edərsə və ya hesabı qaydaları pozduğuna görə bloklanarsa, ödənilmiş məbləğ heç bir halda geri qaytarılmır.

4. Qəti Qadağan Olunmuş Məhsullar və Fəaliyyətlər

4.1. Spirtli İçki Qadağası: Topdan platformasında istənilən növ spirtli içkilərin (pivə, şərab, araq, konyak, viski və s. daxil olmaqla, lakin bununla məhdudlaşmayaraq tərkibində etil spirti olan hər cür içki) satışı, reklamı, kataloqa əlavə edilməsi QƏTİ QADAĞANDIR.

4.2. Cəza Tədbirləri: 4.1. bəndinin pozulması (sistemə spirtli içki əlavə edilməyə cəhd və ya gizli adlarla əlavə edilməsi) aşkar edildiyi an, Topdancının hesabı heç bir xəbərdarlıq edilmədən, dərhal və birdəfəlik bloklanacaqdır. Bu halda aktiv abunəlik ləğv edilir və ödəniş geri qaytarılmır.

4.3. Eyni zamanda, Azərbaycan Respublikasının qanunvericiliyi ilə satışı qadağan edilmiş və ya xüsusi lisenziya tələb edən digər qeyri-qanuni, təhlükəli, mənşəyi məlum olmayan məhsulların platformada satışı qadağandır.

5. Topdancının Vəzifə və Öhdəlikləri

5.1. Topdancı platformada nümayiş etdirdiyi məhsulların qiymətlərini, xüsusiyyətlərini və anbar qalıqlarını (stok) daim aktual saxlamağa borcludur.

5.2. Alıcılardan gələn sifarişlər vaxtında (razılaşdırılmış müddətdə) təsdiqlənməli və çatdırılmalıdır.

5.3. Topdancı platformada formalaşan elektron fakturaların (və ya qaimələrin) reallığı əks etdirdiyinə və vergi qanunvericiliyinə uyğun olmasına özü cavabdehdir.

6. Məsuliyyətin Məhdudlaşdırılması (Platformanın Sığortalanması)

6.1. Vasitəçilik Statusu: Topdan sadəcə Topdancı və Alıcıları bir araya gətirən, satış və logistika proseslərini asanlaşdıran texnoloji xidmət təminatçısıdır.

6.2. Maliyyə və Borc Məsuliyyəti: Platforma Alıcıların Topdancıya olan borclarına (nisyə əməliyyatlar daxil olmaqla), ödəniş gecikmələrinə və ya iflasa görə HEÇ BİR məsuliyyət daşımır. Tətbiq daxilindəki "Borclar" və "Nisyə" bölmələri yalnız informasiya xarakteri daşıyır və hüquqi tələb bazası rolunu oynamır.

6.3. Məhsul Keyfiyyəti: Satılan məhsulların yararlılıq müddəti, keyfiyyəti, xarab olması və ya daşınma zamanı zədələnməsi tamamilə Topdancı və Alıcı arasındakı daxili məsələdir. Platforma bu proseslərdə tərəf deyil.

7. Texniki Fasilələr və Xidmətin Dəyişdirilməsi

7.1. Platforma texniki xidmət, yenilənmə və server tənzimləmələri zamanı tətbiqin işində qısamüddətli fasilələr yarada bilər.

7.2. Platforma əvvəlcədən xəbərdarlıq etməklə abunəlik qiymətlərini, xidmət şərtlərini və ya ödənişsiz məhsul limitini (10 ədəd) dəyişdirmək hüququnu özündə saxlayır.

8. Qanunvericilik və Mübahisələrin Həlli

8.1. Bu Şərtlərlə bağlı yaranan bütün mübahisələr danışıqlar yolu ilə həll edilir. Razılıq əldə olunmadıqda, mübahisələrə Azərbaycan Respublikasının qanunvericiliyinə əsasən, Azərbaycan Respublikasının müvafiq məhkəmələrində baxılacaqdır.

Topdan Sat

Alıcılar üçün İstifadə Şərtləri və Qaydaları · topdansat.app

Topdan – Alıcılar üçün İstifadə Şərtləri və Qaydaları

1. Ümumi Müddəalar və Şərtlərin Qəbulu

1.1. Bu İstifadə Şərtləri (bundan sonra "Şərtlər") Topdan (bundan sonra "Platforma") ilə tətbiqdə məhsul almaq məqsədilə "Alıcı" (və ya "Mağaza") kimi qeydiyyatdan keçən hüquqi və ya fiziki şəxs arasındakı hüquqi münasibətləri tənzimləyir.

1.2. Alıcı tətbiqdə qeydiyyatdan keçərək bu sənəddəki bütün müddəaları qeyd-şərtsiz qəbul etdiyini təsdiqləyir.

1.3. Bu platforma B2B (Biznesdən-biznesə) formatında fəaliyyət göstərir. Tətbiq üzərindən alınan məhsullar şəxsi istehlak üçün deyil, təkrar satış və ya biznes fəaliyyətlərində istifadə üçün nəzərdə tutulur.

2. Qeydiyyat, Hesab Təhlükəsizliyi və Doğrulama

2.1. Alıcı hesabı yaratmaq üçün aktiv VÖEN-ə (Vergi Ödəyicisinin Eyniləşdirmə Nömrəsi) malik olmaq və real fəaliyyət göstərən ticarət və ya xidmət obyekti (supermarket, mini-market, aptek, restoran, kafe, otel, tikinti materialları mağazası, kosmetika salonu və digər ixtisaslaşmış satış mərkəzləri) idarə etmək məcburidir.

2.2. Alıcı qeydiyyat zamanı təqdim etdiyi məlumatların (mağaza/obyekt adı, dəqiq fiziki ünvan, əlaqə nömrəsi, VÖEN) doğruluğuna tam zəmanət verir.

2.3. Hesabın aktivləşdirilməsi Platforma adminlərinin təsdiqindən sonra baş tutur. Platforma şübhəli hallarda (və ya yoxlanış məqsədilə) VÖEN çıxarışı tələb edə bilər.

2.4. Təhlükəsizlik səbəbilə Alıcının Telefon nömrəsi, VÖEN və Region/Kateqoriya məlumatları sərbəst şəkildə dəyişdirilə bilməz. Bu cür dəyişikliklər yalnız Dəstək Xidmətinə müraciət əsasında mümkündür.

3. Sifarişlər, Alqı-Satqı və Çatdırılma

3.1. Platforma yalnız Topdancı və Alıcı arasında əlaqə yaradan, kataloq nümayişi və sifarişlərin idarəolunması xidməti göstərən texnoloji vasitəçidir.

3.2. Alıcı sifarişi təsdiqlədikdə, o, məhsulu qeyd olunan qiymətlə almaq barədə Topdancı qarşısında öhdəlik götürmüş sayılır. Səbəbsiz yerə davamlı olaraq sifarişdən imtina edən Alıcıların hesabı məhdudlaşdırıla bilər.

3.3. Çatdırılma zonaları və müddətləri Topdancılar tərəfindən müəyyən edilir. Platforma çatdırılmanın gecikməsinə görə məsuliyyət daşımır.

3.4. Alınan məhsulun keyfiyyəti, zədələnməsi, qablaşdırılması və ya geri qaytarılması (zay mal) şərtləri birbaşa Alıcı ilə Topdancı arasında həll edilir.

4. Ödənişlər və Nisyə (Borc) Sistemi

4.1. Platforma daxilində Alıcının Topdancıya olan borclarını izləmək üçün "Borclar" (Nisyə) modulu fəaliyyət göstərir. Bu modul hər iki tərəfin rahatlığı üçün sadəcə informasiya xarakterli rəqəmsal dəftərçə rolunu oynayır.

4.2. Platforma Alıcının Topdancıya olan borcunu ödəməsinə, ödənişin gecikməsinə və ya maliyyə mübahisələrinə görə heç bir məsuliyyət daşımır.

4.3. Qaimə və fakturaların qanunvericiliyə uyğun olaraq rəsmiləşdirilməsi tərəflərin (Topdancı və Alıcının) öz vəzifəsidir.

5. Qadağan Olunmuş Fəaliyyətlər

5.1. Alıcıya fərqli dükan adları və ya saxta VÖEN-lərlə birdən çox hesab açmaq qadağandır.

5.2. Alıcı, platformada qadağan olunmuş məhsulların (məsələn, spirtli içkilər) satıldığını və ya Topdancı tərəfindən saxta fakturaların yazıldığını gördükdə, bu barədə Dəstək Xidmətinə məlumat verə bilər.

5.3. Sistemin işinə zərər verəcək süni sifarişlərin (spam) yaradılması qəti qadağandır və hesabın dərhal bloklanması ilə nəticələnəcək.

6. Məsuliyyətin Məhdudlaşdırılması və Hesabın Bloklanması

6.1. Platforma texniki xidmət səbəbindən yaranan qısamüddətli kəsintilərə görə Alıcının ticarət prosesində yaranan axsama üçün maddi məsuliyyət daşımır.

6.2. Platforma, istifadə qaydalarını pozan, topdancılarla mütəmadi olaraq problem yaşayan və ya şikayət alan Alıcının hesabını xəbərdarlıq etmədən dondurmaq və ya tamamilə silmək hüququnu özündə saxlayır.

7. Qanunvericilik və Mübahisələrin Həlli

7.1. Bu Şərtlərlə bağlı yaranan bütün mübahisələr danışıqlar yolu ilə həll edilir. Razılıq əldə olunmadıqda, mübahisələrə Azərbaycan Respublikasının qanunvericiliyinə əsasən, Azərbaycan Respublikasının müvafiq məhkəmələrində baxılacaqdır.

Topdan Sat

Hesabın və Məlumatların Silinməsi Qaydası · topdansat.app

Hesabın və məlumatların silinməsi

Topdan Sat hesabınızı istənilən vaxt özünüz bağlaya bilərsiniz. Bunun üçün bizə müraciət etmək məcburi deyil — əməliyyat tətbiqin içindədir.

Tətbiqdən silmək

1. Topdan Sat tətbiqinə daxil olun.
2. Aşağıdakı menyudan Profil bölməsini açın.
3. Tənzimləmələr → Hesabı Sil seçin.
4. Səbəbi qeyd edib Hesabımı Birdəfəlik Sil düyməsini təsdiqləyin.

Tətbiqə girişiniz yoxdursa

Telefonunuzu itirmisinizsə və ya hesaba girə bilmirsinizsə, qeydiyyatdan keçdiyiniz e-poçt ünvanından info@topdansat.app ↗ ünvanına yazın. Mövzu sətrinə Hesabın silinməsi yazmağınız kifayətdir. Müraciətiniz ən geç 30 gün ərzində icra olunur.

Nə silinir, nə qalır

Abunəliyiniz varsa

Pro abunəliyi hesabın silinməsi ilə avtomatik dayanmır. Onu ayrıca ləğv edin: Android üçün Google Play → Abunəliklər, iPhone üçün Parametrlər → Apple Hesabı → Abunəliklər.